Geschiedenis

Hoe is ut eigeluk begoos…

(Heejonder wurd ien ut kort wat ovver de historie verteld.

Ien ut urste jaor daat d’r enne Prins waor (ien 1958), waor d’r nog genne Tour De Brokeze. Ien daat jaor weerd d’r op canavalsdeensdag 18 fibberwarie enne voetbalwedstrijd georganiseerd op de Stokt achter de boordereej vaan Sjaak van Mège wao toen ut voetbalterrein waor. Allemaol de speulers waore verkleid en de Raod van Elf speulde tegge de veterane van Brughusia. Ut waor en ludiek gebeure, kleug zat en de stemmimg zoot der good ien. Naodiël waor daat ut alliën verrekkes kald waor, waodur Raodslid Jac Gooren zei: “Daan fiets ik volgend jaor nog livver un rundje um de kerk mit waat gekke fietse”.
Ien 1959 waor daomit d’n urste Tour vaan Brokeze gehalde en de winnaar waor: “Gorenski Jacobi”, oftewel Jac Gooren.

Gorenski hed d’n Tour gemaakt….

D’n bedeenker vaan D’n Tour is daorum mit recht “Gorenski Jacobi”, en daat feit huure we geregeld nog us trug umdaat d’r oeit en liedje ôvver is gemaakt waat nog steeds gezonge werd:

Refrein:
Gorenski hed d’n Tour gemaakt, Doedaa, doedaa
Gorenski hed d’n tour gemaakt, doedadoedadee,
Doedadoedadee, doedadoedadee,
Gorenski hed d’n Tour gemaakt,
Doedadoedadee.

(…Wat ut couplet eksakt waor, hed tot op d’n daag vaan vaandaag niemus oeits mer kunne achterhale….)

Vurval:

D’r is oeit enne Amerikaan beej d’n Tour De Brokeze gewes, den zô enthousiast waor, en dáát liedje zô moj, daat heej d’r zién vertaling vaan hed gemaakt mit de bôdschap daat iederiën ut vort mit moos zinge: “Now, everybody sing this song, doedaah doedaah….”
… en wat ze nou ien de verenigde state vaan Amerika nog steeds zinge….

Heeronder un paar foto’s vaan De Tour vaan Brokeze uut de urste jaore.

Groepsfoto vaan d’n twedde Tour De Brokeze ien 1960.

Ok ien 1973 al waor d’r enorme belangstelling beej den Tour.

Tour ien 1968 beej “De Col de Ekster”: (De Pliessie Wiel vaan De Smit hult ut verkier ien de gate..)

Tour ien 1970 mit jury, Prins (Gerrit I) en verslaggaever ien de wage.

1970: Gorenski Jacobi wurd onderscheiden

Tourkommissie

Ien ut begin weerd aal ut werk bedooch en uutgevoerd dur de carnavalsvereniging.
Ien 1970 is d’r en Tour-kommissie gevurmd dea zich spesjaal reechte op de organisatie vaan D’n Tour.

2x winnaar

Ien 1972 hed Gorenski Jacobi vur d’n twedde kier d’n Tour gewonne. Den is daomit tot op heeje d’n ennigste renner dae daat oeit is gelukt….

Alliën vur kels?

Vroeger moogte d’r alliën kels mit doon. Taegeworrig mugge ok de vrouwlie uut Brokeze op enne fiets stappe en zich wage aan dit groëte evenement. Ien 1994 hed vur ut urst un Brokezer megje d’n Tour gewonne; daat waor de renster “Indiana Jo” (Jolanda Moest).

Fietscreaties

Um enne mojje Tour te make mot d’n Tour vaan un aantal belangrieke ingrediënte werre vurzeen. Ut make vaan enne mojje fiets is daomit wel ut belangriekste ingrediënt. Op de foto’s vaan vroeger kunde al zeen daat d’r zeker toen al hiël verassende fietscreaties woorte gemaakt.
Servaas Reintjes waas zonne techneut vaan ut urste eur den destieds schitterende hoëgstandjes hed gemaakt. Ziene “loëpfiets” waor dao en prachtig vurbield vaan.

Tour 1968: Feus (Servaas Reintjes) mit de loëpende fiets

Ien de jaore niggentig is Steffie Brown (Jos Vousten) ok erg bedreve gewes mit ut ontwikkelen en vervaardigen vaan un goj werkende en uutzonderlijke fietscreatie, waat eum toen d’r tied hiel wat prieze hed opgeleverd beej ut onderdiël mojste fiets. Heejonder zidde twiëje moj vurbielde.

Steffie Brown mit De “Onnoemeluk hoëge – wao geej grus onder dur kunt fietse” – fiets.

Steffie Brown mit De “Ik fiets heejbaove rundjes en guj toch vurruut”-fiets

Opzet vaan De Tour de Brokeze

Al vaanaf ut begin is d’n opzet wel duudelijk gewes. Ut is enne kolderieke fietswedstrijd, mit gekke fietscraeties en verassende uutdossingen, mit enne hoëp schaele wazel wat uuteindelijk erg leuk is vur zôwel de toeschouwers ás de diëlnemers. Wat oeit klein is begoos, en al snel hiël vul toeschouwers trok, is nog steeds un carnavalsevenement waat op zien minst geszegd erg de moeite is um te bekieke, mit elluk jaor neej verassinge, ien un nog steeds aoverzichtelijk gezellig formaat. Daat “ut fietse” en de “Tour De Brokeze” ien iëne ojjum mit de carnaval vaan Brokeze werre genoemd is te danke aan ut succes vaan dees Brokezer carnavalstraditie. Al mit al het den tied wel uutgeweze daat ut en geslaagde formule is want ut left nog altied enorm ien os dörp. Het monument van de fiets van Hay Coenders àn de zuidkant van Brokeze daen dao ien 1984 is nèr gezatte toen de parochie 500 jaor bestond, is dao en dudelek bewies van.

Ut fietsmonument ien Brokeze.